На мінулым тыдні праходзіў Тыдзень беларускай мовы і літаратуры. Было шмат мерапрыемстваў, і яны праходзілі кожны дзень. Самым цікавым і пазнавальным для мяне было Інтэрактыўнае падарожжа па станцыях «Па прыступках роднай мовы». Наш клас падзяліўся на каманды. Кожная каманда выконвала заданні: адказвалі на пытанні, разгадвалі рэбусы і загадкі, успаміналі беларускія казкі і прыказкі. Мне спадабалася гуляць у камандзе. Было весела і захапляльна.
Таксама я прыняла ўдзел у выставе творчых праектаў “Рускай мове дай разгрузку – размаўляй па-беларуску”. Я падрыхтавала ўлётку з нацыянальным беларускім адзеннем, на якім кожны элемент быў зашыфраваны — трэба было разгадаць рэбусы. Прыдумляць рэбусы самастойна аказалася не так ужо і лёгка, але цікава.
Напрыканцы тыдня мы пісалі Агульны дыктант “Пішам па-беларуску разам”. Я вельмі старалася напісаць яго добра і лічу, што гэта ў мяне атрымалася. Дзявятка — гэта ж добрая адзнака!
Мне было б цікава паўдзельнічаць у падобных імпрэзах і па іншых прадметах. У іх можна даведацца шмат новага і цікавага.
Паліна Станкевіч, вучаніца 4 «Б» класа