Тыдзень беларускай мовы запомніўся рознымі цікавымі мерапрыемствамі. Майстар-клас па вырабе календара “Мая мова – жыцця аснова” стаў для мяне сапраўднай крыніцай натхнення! Гэта былі не проста творчыя заняткі, а захапляльнае паглыбленне ў культуру, традыцыі і багацце беларускай мовы.
З самага пачатку майстар-класа панавала сяброўская і натхняльная атмасфера. Марыя Валер’еўна прадумала ўсё да драбніц: ад захапляльнага апавядання аб значэнні роднай мовы да творчага працэсу стварэння ўласнага календара. Было прыемна бачыць, як кожны ўдзельнік укладвае ў сваю працу часцінку душы, эксперыментуе з дызайнам.
Мы не проста стваралі каляндар, але і напаўнялі яго сэнсам, дадаючы цытаты, элементы беларускага арнаменту. Гэта дало магчымасць не толькі праявіць фантазію, але і лепш адчуць нацыянальную самабытнасць.
Час праляцеў незаўважна, і ў канцы майстар-класа ў кожнага засталася прыгожая і ўнікальная праца, зробленая сваімі рукамі. Гэта не толькі карысны прадмет, але і памятны сувенір, які зараз будзе цешыць вока і нагадваць пра важнасць захавання роднай мовы.
З нецярпеннем чакаю новых сустрэч і творчых майстар-класаў!
Сафія Літвін, вучаніца 4 «Б» класа