На мінулым тыдні праходзіў Тыдзень беларускай мовы. Было шмат розных мерапрыемстваў, і яны праходзілі кожны дзень. Самым цікавым і пазнавальным для мяне была выстаўка “Таямнічае святло абярэгавых лялек, альбо як нашы продкі стваралі шчасце сваімі рукамі”.
На мой погляд, гэта цудоўны праект, ён дапамагае вучням знаёміцца з самабытнымі традыцыямі беларускага народа, даведвацца, што ва ўсе часы людзям блізкія і важныя каштоўнасці сям’і і дзяцей, дабрабыту і набытку. Дапамагае адчуць сябе часткай народа са старажытнымі традыцыямі праз вельмі простыя паняцці як праца, любоў і клопат пра блізкіх, пра ўраджай, праз імкненне і веру ў заўтрашні дзень і перамогу дабра ва ўсе часы.
Выстава аформлена ў традыцыйных колерах і з нацыянальным арнаментам. Усе лялькі выкананы вельмі акуратна. Я атрымаў задавальненне і даведаўся шмат новага. А цікавае, меладычнае апавяданне на роднай мове дадало імкнення ў яе вывучэнні.
На некаторы час мы пагрузіліся ў старажытныя беларускія традыцыі і абрады!
Дзякуй Марыі Валер’еўне за любоў да роднай мовы, нашых традыцый і за магчымасць даведацца пра іх. Асобная падзяка за майстар класы па вырабе лялек, у мяне дома іх ужо тры!
Фёдар Путаў, вучань 4 «Б» класа